الزوج البيتوتي
 

السلام عليكم ..

تزوجت من شخص ما يقرب لي ولا بينا اي قرابة كل واحد من قبيلة مختلفه
ولكن العادات متشابهه
انا تربيت وهو ايضا في اجواء عائلية الحمدلله يعني هو تربى يطلع اكثر شي
ويروح يلعب مع اخوانه
وانا كذلك

تزوجته وعشت معه اول سنة بهدوء وسلام و ثاني سنة حملت بطفلي
الان بعد مرور 3 سنين ونص على الزواج
زوجي بدا ينفصل عننا اكثر عن قبل اقوله نسافر يبي يسفرني ديرتهم مع اهله فقط
واهله موجودين بنفس مدينتنا و بيتهم ملاصق لبيتي تماما ليش اروح معهم لنفس الديرة ابي اغير جوو ..

اقوله نطلع نتغدى نغير عن البيت يقولي لا ..

نسهر ماله خلق بس يطلع خلقه لغيرنا عادي

حتى ولده بعمر سنة ونص ما يطلعه ينزله الحوش فقط
يمشيه و يقول كفاية بعكس لما اروح بيت اهلي اخواتي المتزوجات يحنون على ولدي
وامي وابوي ياخذونه ويمشوونه ويودونه اماكن العاب مناسبة لعمره

قبل يومين طلبت منه اسافر مع الوالدة بما انها بتسافر وما ابدى اي تعارض
بعدها بكم ساعة جاني مصدوم لان اصحابه وحريمهم سافرو تمشية لاماكن جديدة
يقول ليش محد تكلم ما يقول بنسافر ولا بنطلع وش فيهم يخبون
قلت له علاقة خاصة ليش يشاورك متزوجك انت ولا بنت الناس ؟ و اكيد بيسافرون ليش تتوقع
انهم بيجلسون هذا الطبيعي العوائل يسافرون وياخذون فترة نقاهة بين وقت للثاني
خصوصا قبل الحر يشتد
بعدين بدأ يتململ ويقول يومه ممل وماجوو اخوانه كل واحد مشغول والي بالنادي
والي طالع مع عياله

يعني مدري يحسب اخوانه مثله تاركين بيوتهم طول الوقت و طالعين ؟
ولا ماعندهم اشغال وبيقعدون فاضيين له طول الوقت

مجمل الكلام .. زوجي بيتوتي لا يطلع لا يودي معتمد بمشاويري على اوبر وكريم
طلعة مع ربعه يطير ويروح لو بالمريخ
حدث او مناسبة مع اهلة .. على طول ينبسط معهم ويطلع .. ويتحمس
لكن انا وولده محرومين من هذا كله

..
هل في امل يتغير ولا اخليه مثل ماهو براحته وانا اعيش حياتي طول بعرض




اضغط هنا للذهاب لعنوان موضوعنا...