الضيقة من بيتنا و اهلي
 

عندي مشكلة اني احس بالضيق و الغضب في بيتنا و لا اقدر انجز شيء لا بالعمل و لا بشغل البيت
ولا حتى بغرفتي و عزلتي بس منسدحة ومهمومة و متنكده، احس في شيء كااااااتم على قلبي و اتنرفز من اهلي واحيان انفجرر بغضب شديد وارجع اندممممم بس شعور غصب عني!

طلعت ابتعاث مع والدي و كانت من اروع السنوات في حياتي ! انجز و اتقدم و اطبخ و اغسل و اتعلم و سعيده جداً

بس رجعت ، رجعت لي الحاله و اذا بسوي شغلة اجلس اساااابيع وشهور عشان انجزها و احس في نقد حولي من بعض اخواني و خواتي و احس اني كرهت الدنيا كلها

صرت اتمنى اني يتيمة والا مقطوعة من شجرة و منعزلة في شقة لحالي.

واتوقع لو كنت ولد يمكن استقليت عنهم وزرتهم زيارات عشان صلة الرحم

لكن ياجماعة ضيقة الصدر ذبحتني وعمري يروح وانا ما احس معاهم بالسعادة و المشكلة اخاف عليهم و احزن اذا مرض احد فيهم و اتضايق اذا صار لهم مكروه

لكن ما احس بسعادة داخل البيت ابدا ابدا و الكتمة على صدري ماتفارقني

واللي زادها ان اهلي صاروا يفسرون الضيقة على كيفهم

اللي يقول عصبت يوم شافتني صار لي كذا
والا اللي يقول متضايقة شكلها غارت من كذا
والا اللي يقول شكلها كلمت احد وزعلها
وخذوا لكم من التفسيرات و الظلم و سوء الظن

المشكلة انا نفسي مادري ليش اتضايق من وجود اهلي و احس الكل يأس مني و صرت مهمشة
رغم اني اجاهد واحااااااول اتلطف معهم و اقدم لهم كل اللي يسعدهم

لكن والله ثم والله اني عجزت القى حل




اضغط هنا للذهاب لعنوان موضوعنا...