عدوانيه اهلي بدون سبب!
 

السلام عليكم ورحمة الله وبركاته..

نبذه عني انسان في حالي تماما بعيد عن المشاكل واراعي مشاعر الجميع و حساس اميل للانعزاليه والانطوائيه اكثر , ترتيبي الوسط و عمري الآن 25 سنه , مشكلتي مع اهلي بدايه من ابوي اهم شي عنده اني اكل و اشرب والباقي مهمش تماما لامراعاه مشاعر ولا يربي ولا يدري وين اروح و وين اجي يرجع من دوامه الساعه 6 المغرب يتغدا و يجلس شوي وينام و على هالحال الى ان تقاعد , امي الغالية انسانه بسسيطه جداً ست بيت فقط جاففه غصب عنها مع ان باين من صفاتها الاساسيه الطيبه بس بحكم بيئتها وتربيتها وتعامل ابوي معها غيرها ...

ابوي من و انا صغير يرمي علي كلام و يتعمد احراجي عند الناس بالرغم اني اساسا حياوي جدا و يزيدني اكثر باسلوبه و كلامه معي و يتعمد يظهر الشي ذا قدامهم عشان يبين قوي شخصيه ومسيطر على بيته وهو اساسه ضعيف و هش في المجلس مهمش مع انه اكبر اخوانه من كثر ماهو ضعيف ولا ياخذون برايه شي الا مجامله فقط اتألم وانا اشوف ابوي بهالطريقه بس ما باليد حيله , اجاريه و اجامله ما ارد عليه ابد لغه الصمت هي اللي استخدمها معاه عشانه هو ما احرجه عندهم و عشان رب العالمين هذا الشي اثر علي بقوة قلل من احترامي وهيبتي و نظره الناس لي واني شي نكره ولا لي قيمه وقلل من احترام أبوي..

بالنسبة لأخوي الاكبر اخذ كل اهتمام الوالد و حبه و يناديه ولدي وين راح ولدي ووين جا ولدي ويدق عليه و يهتم فيه اهتمام ملحوظ جدا قدام الكل وحاط قرار البيت كله بيده اذا حضر ابوي ماله اي قيمه كل الاهتمام له و التقدير لان ابوي سلمه الخيط والمخيط , عكسي تماماً يناديني باسمي حاف و بشكل ملحوظظ جدا لدرجه عيال عمي يجيهم فضول وش السبب انه يفضل اخوك الكبير عليك؟ يتجرأون يسألون زي كذا ولا يلامون مين انا عشان يعملون لي حساب! و كيف ابوي يجعل مني ماده سخريه قدام اهلي و الناس يطقطق يقلل من شاني يهمشني قدامهم ما ياخذذ برايي اذا قلت راي يقول العكس تماما بس عشان يعارضني في الاخير يسوي اللي قلته و ينسب الشي هذا لنفسه ! دايم يسوي هالتصرف , المهم الشي ذا عكس حتى على احترام خواتي لي ماصار احد يحترم لهالسبب , بالرغم من اني شايل البيت و اساعد و اعاون و ادفع من راتبي واعطي و اهتم و اسأل و اعزمهم و اذا فيه اغراض اشيلها و اساعد اذا سواق البيت مشغول انا اللي اشيل و اجيب و اخوي اللي مروق و جالس كل الشغل على راسي و الاحترام له !

و طبيعي بيتعامل معاي نفس ابوي بالضبط عشان يمشي على جوه و يعجب فيه اكثر يطقطق و يقلل من شاني عند خواتي يطلعني بالشينه و الصغير دائما قدامهم و يوصل لهم فكره اني صغير عقل ولا افهم و العشوائي اللي ما اهتم في احد فقط في نفسي ووو,,, اشياء كثيره طبعا بسرعه يصدقون و ينكرون الاشياء الللي اقدمها لهم كلها و ينسونها في نفس اليوم..


والله ماعمري غلطت ولا سبيت احد وان صار صار بالغلط واعتذرت بوقتها مساالم لابعد الحدود ,,

ومن اسلوبهم هذا طبيعي اني اتأثر يبين علي اقرر انعزل في غرفتي دون لا ارد ما ابي اجرح احد فيهم وازعله لان ان طلع مني كلام بيطلع قوي جداً ما يتحملونه و متأكد مليون في الميه لاني مجرب نفسي على غيرهم و اكره نفسي اذا وصلت لهذيك المرحله ما يرضيني يوصلها احد من اهلي( قد رديت مره على وحده من خواتي غلطت علي 6 شهور ماطب لساني لسانها وكرهتني كره و كرهت نفسها) ..

واذا عزلت نفسي زعلوا ليش تعزل نفسك عننا تعال اجلس معنا وان جيت تصرفهم عدواني و هجومي ولا لي اي قيمه في الحياه

حتى عيال اخواني و خواتي ينادون اسمي حاف ولا احد يقول لهم شي عكس اخوي لو ينقال اسمه حاف زعلوو بقوه و هاوشوا عيالهم عيب هذا خالكم و هذا عمكم و تعال سلم على عمك فلان , اما انا باسمي حااافف ولا احد يعاتبهم و يكلمهم اصلا ما يقولون رح سلم عليه ,, قلت هذا الكلام ورب البيت ماهموني ولا ابيهم يقولون كذا بس عشان اعلمكم لاي درجه انا واصل عندهم قد ايش مالي اي اهمية ولا لي وجود عندهم..

عجزت افهم ليش كل هالتصرفات علي انا ؟ هلكت نفسيتي وربكم وصلت لهالعمر و باقي الاسلوب ماتغير




اضغط هنا للذهاب لعنوان موضوعنا...